Pëlqejnë të vishen bukur, por edhe shtrenjtë. Ky nuk është një lajm që mund të çudisë njeri, pasi dihet që politikanët tanë, kur vjen puna për t’u veshur, kërkojnë maksimumin.
Madje, nuk e kanë aspak problem të shfaqin luksin e tyre, paçka se janë të përzgjedhurit e popullit të një vendi me varfëri të lartë. Kemi komentuar shpesh deputetë dhe ministra, të cilët vajtjen në Parlament e kanë kthyer në një sfilatë veshjesh të shtenjta, çantash dhe këpucës të markave më të mira.
Nuk ngelen pas edhe makinat e tyre shumë luksoze, me të cilat shkojnë në punë. Këtë herë në rrjetën e paparazzit kanë rënë dy deputete, të cilat këtë të enjtë ishin veshur shumë luks.
E para është Aurora Mara, të cilën e kemi komentuar edhe më herët për çantat e shtrenjta. Por kësaj here, ajo kishte zgjedhur një palë këpucë “Balenciaga”, të cilat kushtojnë rreth 800 euro. Ndërkohë, deputetja e Gjirokastrës, Artemis Dralo, u shfaq me një çantë “Burberry”, e cila kushton rreth 2000 euro.
